عرس نقولا خليل وماري نادر، 23/6/1996
عرْسِك حلُو .. يا زينْة الأعْراسْ
يا بِنْت عَيْلِه .. صيتْها مِهْرا
بَيِّك بِِـ عِرْسِك دَاق أطْيَب كاسْ
مِنْ عِرْس قانا .. كانِتْ الْخَمْرَه
مْنْ جْنُوب .. صَفّى لِلْوَطَن مِتْراسْ
قَدَّمْ شَبَابُو لأَرزْتُو الْخَضْرَا
إبْن الْجنُوب .. بْطُولتو نبْراسْ
وِالْمِجِدْلاوي .. طَلّتُو بْعَشْرَه
وِجِّكْ ضِوِي شَمْعات بِالْقِدّاسْ
وْحَدِّك نْقُولا .. الْـ جَبْهتُو سَمْرا
مْزَنَّرْ بِأُمّ وْبَيّ .. شُو إحْساسْ
أَزْهارْ حلْوِه مْسَيّجِه زَهْرَه
عَيْلِةْ خَليلْ .. بْيِنْحنِيلا الرَّاسْ
عَيْلِه عَظِيمِه .. قَدّْسِي سِرّا
يا بِنْت نَادِر .. إِسْمِك بْيِنْباسْ
بِنْت الأوَادِمْ .. نادْرَه بْطُهْرَا
عْقُولْ البَشَرْ بِالْكايْنِه أَجْناسْ
إِنْتِي وْحَبيبِكْ وَحّْدُوا الْفِكْرَه
إِنْتِي وْحَبيبِكْ رَكّعُوا يوضاسْ
الْـ باعْ رَبُّو بْقِرْش .. يا حَسْرَه
وْبِالْحَقّ .. أُوعا تِقْطَعُوا الأنْفاسْ
بْعُمْرا الْحَقِيقَه .. ما انْطَفَى عُمْرَا
وْكلّ ما تْشُوفُوا الأرْض عَمْ تِنْدَاسْ
بْإِجْرَيْن قِرْفِتْ ريحِتَا الْغَبْرَه
شِكّوا الأَصابِعْ بِِـ قَلْب أَرْجاسْ
أَكْبَرْ خَطِيِّه تِمِسْكُوا الْجَمْرَه
فَرْحِةْ الْخَيّاتْ ما لْها قْيَاسْ
وْفَرْحِةْ الإخْوِه وَعِّتْ السَّكْرَه
وْأُمّك تْزَلْغِطْ .. دقِّتْ الأجْراسْ
لِلطُّهْر .. لِلإخْلاصْ .. لِلْقِدْرَه
مِتْل الدَّهَب صَوْتا .. والإلْماسْ
مْبارِحْ .. رَنينُو رَقَّص السَّهْرَه
وْحَوْلِك وْجُوه النَّاسْ .. أَحْلى نَاسْ
حَبُّوا يْكُونُوا فِرْحانينْ الْيَوْم
مَعْ بِنْت .. نَقِّتْ إِسِمْها الْعَدْرَا
**
