عرس جوزاف سينكوتا وبولينا أبي خطار
ـ1ـ
جايي أَنا الدَّمْعَه بْعِينَيِّي
جايِي تا هَنِّي بِنْت ضَيْعِتْنا
بْإِسْم أُمِّي.. وِبْإسْم بَيِّي
بْإِسمْ كلّ شْمُوع عَيْلِتْنا
جايِي تا قِلْلاّ: يا صَفَا النِّيِّه
يا زَنْبَقَه.. يا بْيَاضْ عِفِّتْنا
يا وَرْدِة الْحَمْرا الْمِسِتْحِيِّه
يا نِجْمِة اللِّي بْراسْ تَلِّتْنا
يا فلّ.. يا مَنْتُور.. يا رْياحينْ
يا تَلْج أَبْيَضْ عَ جَبَلْ صنِّينْ
يا بِنْت ضَيْعَه بْيَعِرْفُوها مِينْ
مَقْلَعْ رُجُولِه.. وْدَيْر قِدِّسِينْ
وْيا بِنْت عَيْلِه مْن الْجدُود مْأَصّلِه
إِنْتي يا سِتّ الْحسْن.. يا بّولينْ
ـ2ـ
يا عَروس الْفَجْر.. يا قَطْر النَّدَى
يَللِّي بْجَمالِكْ بَعْد.. ما وِجْدُوا حَدَا
هْنِيَّال قَلْب الْـ سَارْقِكْ مِنْ مَيْمتِكْ
يَللِّي عَ مَرْباها الْخَليقَه بْتِحْسِدا
كُونِي أَمِينِه.. وِالْوَفَا مِنْ عَيْلتِكْ
هَـ الْعَيْلِةْ اللِّي ما قِوِي عْلَيْها الرَّدَى
كُونِي شَرِيفِه.. وِالصّدق مِنْ شِيمْتِكْ
يَلِّي رْضِعْتِي الصّدْق لَـ آخِرْ مَدَى
وْلا تْدِيرِي لْكِلّ كِلْمِه دَيْنتِكْ
كِلّ كِلْمِه مِفْتِنِه شِغْل الْعِدَى
ـ3ـ
جَايِي بْعِرْسَكْ رَقِّص الأَشْعارْ
يا (دْجَوْزَفْ) الْـ مَرْسُوم عَ وِجَّكْ وَقارْ
إِسمْكُنْ مَشْهُور مِتل أَرْز الرَّبّ
وْمتل تَلِّه.. وْفِي عْلَيْها النَّارْ
مِنْ دُونْ دَوَاكُنْ شُو نَفعْ هَـ الطُّبّ؟
مِتل قِدِّيس وْما عِنْدُو مْزارْ!
يا إبنْ سِينْكُوتا.. يا أَحْلى شَبّ
رُوما الْقَدَاسِه مْزَيّنِه دايِرْ مَدارْ
هْنِيَّالْ قَلْبَكْ كِيفْ ما بْتِنْحَبّ
وْأَصْلَكْ إِيطالِي.. مِن عِند بطْرُسْ
قِدّيسْنا.. الْـ رَافِعْ بِـ روما شْعارْ
ـ4ـ
جايِي تا هَنِّي كِلّ الِمْحِبِّينْ
جايِي تا هَنّي آلْ سِينْكُوتا
وْبَيْت بُو خطَّارْ مجْتِمْعِينْ
هَـ الْعَيْلِة اللِّي حْلِفْت بِحْياتا
ـ5ـ
وْبُكْرا إذا بْيِتْدَوَّن التَّارِيخْ
رَح بْتِقْرُوا بْصَفْحِة النِّسْوانْ
بْناتْنا وصْلُوا عَلَى الْمَرِّيخْ
وْعَطْيُوا دْرُوسْ تْعَلِّمْ الإِنْسَانْ
وْصارُوا سَفارِة أَرْز ما بِتْشِيخْ
حَتَّى وَلَوْ بِتْخَتْيِرْ الأَزْمانْ
وْرَبُّوا وْلادُنْ بِـ حِمَى حْبَابُنْ
مِنْ هَيْك كِيفْ ما بْرَمتْ بِالْبُلْدانْ
بْتِقْرا سَطْر عَ عَتْبِةْ بْوابُنْ:
بْهَـ الْبَيْت أَرْزِه مِنْ جَبَل لُبْنانْ
ـ6ـ
شُو فْرحْت لِمِّنْ شِفْتِك فْرِحْتِي
وْإِبنْ أَعْظَمْ ناسْ نِقَّيْتِي
انْشاللَّـه السّعادِه وِالهَنا وِالْخَيْرْ
يْضَلُّوا بْطَرِيقِكْ كِيفْ ما رِحْتِي
بَيِّي نَدَرْ مِنْ أَلْف دَيْر وْدَيْر
تْجِينَا أخْت تا تْزَيِّن السِّتِّه
بَسّ وِحْياة الْـ خَلَقْ هَـ الطَّيْر
وِالسَّما والأَرْض وِالنِّجْماتْ
حاسِسْ كَأَنِّي بِـ عِرسْ أُخْتي
**
