عبير الزهر
عبير الزهر
عرس حميد عبّود وماري ضاهر
ـ1ـ
ناطِرْ أَنا ناطِرْ
عِينَيْنْ تِضْحَكْلِي
شْفافْ تِنْدَهْلي
تا إِرْفَع قْناطِرْ
وْزَيِّن السَّهْلِه
بْأَفْراحْكُنْ أَهْلِي:
عَبُّود مَعْ ضَاهِرْ
ـ2ـ
يا كْفِرصْغاب الْمَجْدْ
بِالْمُغْتَرَبْ وِالْجرْدْ
وِشْوَشْتِك بْحِبِّكْ
بَعْد.. قِلْتِي: بَعْدْ
بْفَرْحِةْ حَمِيد الْيَوْم
ما دِقْت طَعْم النَّوْمْ
قَعْدتْ إِكْتُب شِعْرْ
وْإِجْمَعْ عَبيرْ الزَّهْرْ
تا قَدِّمُنْ لِعْيُونْ
ماري.. عَرْوس الْفَجْرْ
ـ3ـ
ماري، يا ماري تْخَرْسَن لْسانِي
الْفَرْحَه قَوِيِّه ما لِها تانِي
لِمِّنْ إِبِن عَبُّود نَقَّاكِي
رَقْصِتْ بِـ تُولا زْهُور فِرْحانِه
يا أَرْزة الْـ بِالْهَجْر مَحْلاكي
كِرْمال عَيْنِك فِضْيِت قْناني
وِالشّعْب يَللِّي بْغُرْبِتُو باكي
انْشَاللّـه بْيِفْرَح مِتل ما فْرِحْتي
وْيِرْجَع لْعِزُّو شَعْب لُبْناني
ـ4ـ
مِدُّوا إِيدَيْكُنْ حَيّكُوا الطَّرْحَه
قِدَّامْ عَيْني عْيُون مِنْشِرْحَه
قْلُوبْنا انْجَرْحِت عَ مَوْطَنَّا
وْفِزْعِت شْعُوب الْكَوْن مِن جُرْحَا
حاسِس اللَّيْلِه قَلبْنا تْهَنَّا
انْشِاللّـه عَ طُول الْعُمْر هَـ الْفَرْحَه
**
طلة المنتور
عرس تلميذتي ليان فوّاز الحدشيتي
عِلَّمْتِكْ.. وْكِنْتِي الْفِهِمْ كِلُّو
وْكِنْتِي الْبَرَاءَه بْسَيّدِة لُبْنَانْ
وْكِنْتْ شُوف الْكِلّ بِيدِلُّوا
عَ الشّاطْرَه اللِّي إِسْمِهَا لِيَانْ
وْهَلَّقْ كْبِرْتِي.. أُوفْ شُو بْجِلُّو
الْبَيْتْ اللِّي رَبَّاكِي بِـ هَالْهِجْرَانْ
إِمِّكْ.. حَنَانَا نبعْ.. بِيمَلُّوا
مِنْ مَيِّتُو تَا يِشْرَب الْعطْشَانْ
وْفُوَّازْ .. هَالْفُوَّازْ شُو بْقِلُّو
وْهُوِّي الْـ زَرَعْ بِـ دَرْبِك الإِيمانْ
إِمِّكْ وْبَيِّكْ قَلِبْنَا احْتَلُّوا
وِبْإِحْتِلاَلُنْ قَلِبْنَا فِرْحَانْ
وْفِي تْنَيْنْ بِـ حَدْشِيتْ بِيصَلُّوا
مِنْشَانْ أَللـه يوَفِّقْ العِرْسَانْ
حَنَّا وْسَلِيمِه صَوْتْهُنْ عَلُّوا
وْرَقْصِتْ عَلَى زْلاغِيطُنْ الوِدْيَانْ
وْمَالِكْ عُيُونُو بْطَلّتِكْ غَلُّوا
يا طَلِّةْ الْمَنْتُورْ وِالرِّيحَانْ
مَالِكْ بَطَلْ .. زِنْدِ الْعَدُو شَلُّو
قَضَّى الْعُمِرْ عَ أَرِزْتُو سِهْرَانْ
الْـ بِيمِدّ إِيدُو بَسّ.. يَا دِلّو
دَمُّو عَ مَدْبَحْ أَرزتُو قربَانْ
بْيِرفُضْ الإِعْدَى بْأَرْضْنَا يْضَلُّوا
بْيِرْفِضْ يْعِيشْ وْمَوْطنُو يِئْسَانْ
عِنْدُو بَعِدْ أَللـه جَبَلْ لُبْنَانْ
**
أعظم حكيم
يوم زواج الدكتور جوزاف لويس البعيني
تْزَوَّجْ حَبِيب الْقَلبْ يا حَنَّا
وْدَمْعِة رَابِيكَا سِقْيِت الْخَدَّيْنْ
بْجَاه السَّما وِالأَرْض يِتْهَنَّى
أَعْظَمْ حَكِيم.. وْيحرسُو مْن الْعَيْن
هَيْدا جُوزَاف لْوِيس مِنْ عِنَّا
مِن مِجِدْلَيَّا الْـ ضِحْكِتَا رَطْلَيْنْ
قَلْبُو كْبِير لْحِلْوِتُو غَنَّى
هُوِّي وْياها تْنَيْن.. أَحْلَى تْنَيْن
**
عين الشمس
كتبتها ليلقيها السيّد حنّا بعيني من بلدة كرم سدّة بعرس ابنته لورا.
ـ1ـ
كِنْتِي (لُورَا بْعَيْني) كِيفْ
يا بَابَا بِتْطِير طْيُورْ
رِبَّيْتِك.. وِالْكَفّ نْضِيفْ
عِلَّمْتِكْ وِنْدَرت نْدُورْ
وْأُمِّكْ كِل ما تْقِصّ رْغِيفْ
مْنِتْنَشَّقْ رِيحِةْ بِخُّورْ
كُوني مِتْلا.. بْلا تِصْنِيفْ
حِبِّي بَيْت حْماكي كْتِيرْ
صَارْ إِسْمِكْ (لُورا مَنْصُورْ).
ـ2ـ
يا جُورج الْـ بِالتَّقْوَى رْبِيتْ
بْحِضْن الأُمّ.. بْعَطْف الْبَيّ
أَطْيَبْ مِنْ قَلْبَكْ ما لْقِيتْ
بْعَين الشَّمسْ بْتِتْرُكْ فَيّ
هْدِيتَكْ عُمْري لَمَّا هْدِيتْ
بِنْتي لْصِهرْ بْعِدُّو خَيّ
الْغُرْبِه غدَّارَه، ما نْسِيتْ
كِل ما دِبْلِتْ زَهْرِةْ حُبّ
سْقُوها مِنْ عِينَيِّي مَيّْ
ـ3ـ
أَهْلا وْسَهْلا بْكِلّ النَّاسْ
الْـ حَبُّونَا مِنْ دُون قْياسْ
انْشَاللَّـه مِنْرِدّ الأَفْراحْ
وِهْمُوم بْلادِي بْتِنْزاحْ
تا يِصْفَى وِيْطِيب الْكاسْ
**
جيران الرّضا
عرس مارك أبي خطّار
ـ1ـ
وِصْلِتْ عَلَى بْلَوْزا زْلاغِيط الْفَرَحْ
يا مجدلَيَّا فَرْحتِكْ عِيدي
فَرْحَه كْبِيرِه كْتيرْ.. قِدَّاما انْشَلَحْ
مَلْيُون وَرْدِه انْقَطْفِت بْإِيدي
كِرْمال كِنِّه.. شَاعْرِكْ لَوْلا شَرَحْ
عَنْ فِهمْها.. بْيِتْعَتَّق نْبيدي
آيِةْ جَمال الْوَرْد عَ خْدُودَا انْجَرَحْ
وْمِن ضِحْكِتَا بْتِخْلَقْ دِني جْديدِه
كِرْمالْ شَبّ.. الْكَوْن مِتْلُو ما لَمَحْ
مِنْ بَيتْ بُو خطَّارْ.. جِيران الرّضَا
يا مِجدليَّا زَلغْطِي وْزيدي
ـ2ـ
صدَّقتْ هَلَّقْ.. بَعدْ كلّ اللِّي انْحَكَى
عَنْ هَـ الشَّلِيفِه الْـ صَار أَللَّـه مْبارَكَا
يا مَارك.. إِنْت وْهَـ الْعَرُوس الزَّنْبَقَه
فِيك الدِّنِي، بْنِتْفِةْ مَحَبِّه، تِمْلِكَا
حِبَّيتْها وْخِبَّيتْ يَوم الْمُلْتَقَى
وْصِرت السَّعادِه بْفَرد إِيد تْحَرِّكَا
يا إِبِنْ عَيْلِه عايْشِه عِيشِةْ تقَى
بِالسِّرْ عِرسَكْ كانْ.. خِفْت تْلَبِّكَا
لَكِن كَمالْ الأُمّ يَللِّي مْعَلّقَه
سْنينَا عَ فَرْحِةْ ماركْ.. مُشْ رَحْ تِتْرِكَا
قالِتْ: يا حَنَّا قُومْ شَمْسِي شَارْقَه
قِللُّو لْيُوسِفْ رِنّ جَمِّعْ أَهِلْنا
دَبْكِة زْغِير الْبَيتْ لازِمْ نِدْبِكَا
ـ3ـ
انْشَاللَّـه بْتِتْهَنُّوا عَلَى طُول الْمَدَى
وْضِحْكاتْكُنْ بِالْعُمرْ يِطْلَعْلا صَدَى
إِنْتُو تْنَينْ.. وْحُلمْكُنْ تِبْنُوا عْيالْ
لا تِتْركُوا هَـ الْحُلمْ يِطْويهْ الرَّدَى
عِيشُوا بْسَعادِه وِبْفَضَاوِةْ بالْ
مِنْ دُونْ سَعادِه هَـ الْعُمر رَايِحْ سُدَى
وْلا تِسْمَعُوا مْن النَّاسْ قِيل وْقالْ
الْقِيلْ.. يا ما هَدَّم بْيُوت البَشَرْ
وِالْقالْ.. ما خَلاَّ حَدَا يْصَاحِبْ حَدَا
**
ماري الزّغيره
ألقيت في عرس جورج وماري غنّوم، 3/7/1992
ـ1ـ
ماري الزّغِيرِه كِبْرِت وْصَارِتْ
زَهْرَه.. تْوَزِّع عِطرْها عَ النَّاسْ
بْبِنتْ كَوْكَبْ ضَيْعتي احْتارِتْ
مِتلْ شَمْعَه.. ضَوِّت الْقِدَّاسْ
فِرْحت الأُمّ الْـ رَبِّتَا وْطارِتْ
صَوْب السَّما تا تِطْرُد الْوِسْواسْ
تْقِللُّو: يا أَللّـه ليشْ تا جارِتْ
سْنِينِي عْلَيِّي وْقَطْعِت الأَنْفاسْ
مُوريس خِدْتُو.. دَمعْتي فارِتْ
حُزْنِي قَتَلْنِي.. الْحُزن ما لُو قْياسْ
وِكْلُود.. لَيْش كْلُود؟.. وِانْهارِتْ
صَعْبِه، يا أَللَّـه، يِنْشربْ هَـ الْكاسْ
بارِك الْبِنْت الْـ عِرْفِت اخْتارِتْ
شَبّ لابِس للرّجُولِه لْباسْ
بارِك عْيالِي كِيفْ ما دَارِتْ
إيد الْعِنايِه.. وْزَيِّنَا بْإِلْماسْ
وْلَوْلا الْغُرْبِه مْنِ الْفَرَحْ غارِتْ
وْغَطَّى الْبرْد عَتْماتْها ياربّ
تْروكْ حنّا يْدَفِيَّا بْإِحْسَاسْ
ـ2ـ
حَدْشيتْ، يا حَدْشِيتْ، بِهْدِيكِي
أَحْلى قَصِيدِه كْتَبتْها بِالْعُمْرْ
وْمُوَّالْ حُبِّي بْحِبّ غَنِّيكي
وْكَوِّمْ عَ إِجْرَيْكي تْلال الزَّهْرْ
زْرَعْنا صَبايا عُمرْنا فيكي
فْرِحْتي، فْرِحْنا، وْطار فينا الدَّهْرْ
وِالْيَوْم بِـ ماري بْهَنِّيكِي
سَمْرا.. وْغاروا مِنْ حَلاهَا السّمْر
وْجُورج مِن خِيرِةْ أَهاليكي
وِمْجدليَّا اعْتَزِّت بْهَـ الصِّهْرْ
ـ3ـ
ماري وْجورج تْنَيْن.. أَحْلى تْنَيْن
انْشَاللَّـه السَّعادِه تْلِفّ إِيَّامُنْ
مْنِ مْحَبِّتُنْ.. سَكْنُوا الْقَلبْ وِالْعَيْنْ
وْحَلُّوا الدِّنِي بِحْلاوِة كْلامُنْ
يا ربّ.. لا تْخَلِّي غْراب الْبَيْنْ
بِالْبَيْن.. يِطْفِي وَهْج أَحْلامُنْ
كِرْمال عَيْنُن بِفْرُش الْكَفَّيْنْ
سِجَّادْ.. يِمْشُوا فَوْق مِنُّو سْنِينْ
وْبِضْوِي شْمُوع الْعُمْر قِدَّامُنْ
عرس حميد عبّود وماري ضاهر
ـ1ـ
ناطِرْ أَنا ناطِرْ
عِينَيْنْ تِضْحَكْلِي
شْفافْ تِنْدَهْلي
تا إِرْفَع قْناطِرْ
وْزَيِّن السَّهْلِه
بْأَفْراحْكُنْ أَهْلِي:
عَبُّود مَعْ ضَاهِرْ
ـ2ـ
يا كْفِرصْغاب الْمَجْدْ
بِالْمُغْتَرَبْ وِالْجرْدْ
وِشْوَشْتِك بْحِبِّكْ
بَعْد.. قِلْتِي: بَعْدْ
بْفَرْحِةْ حَمِيد الْيَوْم
ما دِقْت طَعْم النَّوْمْ
قَعْدتْ إِكْتُب شِعْرْ
وْإِجْمَعْ عَبيرْ الزَّهْرْ
تا قَدِّمُنْ لِعْيُونْ
ماري.. عَرْوس الْفَجْرْ
ـ3ـ
ماري، يا ماري تْخَرْسَن لْسانِي
الْفَرْحَه قَوِيِّه ما لِها تانِي
لِمِّنْ إِبِن عَبُّود نَقَّاكِي
رَقْصِتْ بِـ تُولا زْهُور فِرْحانِه
يا أَرْزة الْـ بِالْهَجْر مَحْلاكي
كِرْمال عَيْنِك فِضْيِت قْناني
وِالشّعْب يَللِّي بْغُرْبِتُو باكي
انْشَاللّـه بْيِفْرَح مِتل ما فْرِحْتي
وْيِرْجَع لْعِزُّو شَعْب لُبْناني
ـ4ـ
مِدُّوا إِيدَيْكُنْ حَيّكُوا الطَّرْحَه
قِدَّامْ عَيْني عْيُون مِنْشِرْحَه
قْلُوبْنا انْجَرْحِت عَ مَوْطَنَّا
وْفِزْعِت شْعُوب الْكَوْن مِن جُرْحَا
حاسِس اللَّيْلِه قَلبْنا تْهَنَّا
انْشِاللّـه عَ طُول الْعُمْر هَـ الْفَرْحَه
**
طلة المنتور
عرس تلميذتي ليان فوّاز الحدشيتي
عِلَّمْتِكْ.. وْكِنْتِي الْفِهِمْ كِلُّو
وْكِنْتِي الْبَرَاءَه بْسَيّدِة لُبْنَانْ
وْكِنْتْ شُوف الْكِلّ بِيدِلُّوا
عَ الشّاطْرَه اللِّي إِسْمِهَا لِيَانْ
وْهَلَّقْ كْبِرْتِي.. أُوفْ شُو بْجِلُّو
الْبَيْتْ اللِّي رَبَّاكِي بِـ هَالْهِجْرَانْ
إِمِّكْ.. حَنَانَا نبعْ.. بِيمَلُّوا
مِنْ مَيِّتُو تَا يِشْرَب الْعطْشَانْ
وْفُوَّازْ .. هَالْفُوَّازْ شُو بْقِلُّو
وْهُوِّي الْـ زَرَعْ بِـ دَرْبِك الإِيمانْ
إِمِّكْ وْبَيِّكْ قَلِبْنَا احْتَلُّوا
وِبْإِحْتِلاَلُنْ قَلِبْنَا فِرْحَانْ
وْفِي تْنَيْنْ بِـ حَدْشِيتْ بِيصَلُّوا
مِنْشَانْ أَللـه يوَفِّقْ العِرْسَانْ
حَنَّا وْسَلِيمِه صَوْتْهُنْ عَلُّوا
وْرَقْصِتْ عَلَى زْلاغِيطُنْ الوِدْيَانْ
وْمَالِكْ عُيُونُو بْطَلّتِكْ غَلُّوا
يا طَلِّةْ الْمَنْتُورْ وِالرِّيحَانْ
مَالِكْ بَطَلْ .. زِنْدِ الْعَدُو شَلُّو
قَضَّى الْعُمِرْ عَ أَرِزْتُو سِهْرَانْ
الْـ بِيمِدّ إِيدُو بَسّ.. يَا دِلّو
دَمُّو عَ مَدْبَحْ أَرزتُو قربَانْ
بْيِرفُضْ الإِعْدَى بْأَرْضْنَا يْضَلُّوا
بْيِرْفِضْ يْعِيشْ وْمَوْطنُو يِئْسَانْ
عِنْدُو بَعِدْ أَللـه جَبَلْ لُبْنَانْ
**
أعظم حكيم
يوم زواج الدكتور جوزاف لويس البعيني
تْزَوَّجْ حَبِيب الْقَلبْ يا حَنَّا
وْدَمْعِة رَابِيكَا سِقْيِت الْخَدَّيْنْ
بْجَاه السَّما وِالأَرْض يِتْهَنَّى
أَعْظَمْ حَكِيم.. وْيحرسُو مْن الْعَيْن
هَيْدا جُوزَاف لْوِيس مِنْ عِنَّا
مِن مِجِدْلَيَّا الْـ ضِحْكِتَا رَطْلَيْنْ
قَلْبُو كْبِير لْحِلْوِتُو غَنَّى
هُوِّي وْياها تْنَيْن.. أَحْلَى تْنَيْن
**
عين الشمس
كتبتها ليلقيها السيّد حنّا بعيني من بلدة كرم سدّة بعرس ابنته لورا.
ـ1ـ
كِنْتِي (لُورَا بْعَيْني) كِيفْ
يا بَابَا بِتْطِير طْيُورْ
رِبَّيْتِك.. وِالْكَفّ نْضِيفْ
عِلَّمْتِكْ وِنْدَرت نْدُورْ
وْأُمِّكْ كِل ما تْقِصّ رْغِيفْ
مْنِتْنَشَّقْ رِيحِةْ بِخُّورْ
كُوني مِتْلا.. بْلا تِصْنِيفْ
حِبِّي بَيْت حْماكي كْتِيرْ
صَارْ إِسْمِكْ (لُورا مَنْصُورْ).
ـ2ـ
يا جُورج الْـ بِالتَّقْوَى رْبِيتْ
بْحِضْن الأُمّ.. بْعَطْف الْبَيّ
أَطْيَبْ مِنْ قَلْبَكْ ما لْقِيتْ
بْعَين الشَّمسْ بْتِتْرُكْ فَيّ
هْدِيتَكْ عُمْري لَمَّا هْدِيتْ
بِنْتي لْصِهرْ بْعِدُّو خَيّ
الْغُرْبِه غدَّارَه، ما نْسِيتْ
كِل ما دِبْلِتْ زَهْرِةْ حُبّ
سْقُوها مِنْ عِينَيِّي مَيّْ
ـ3ـ
أَهْلا وْسَهْلا بْكِلّ النَّاسْ
الْـ حَبُّونَا مِنْ دُون قْياسْ
انْشَاللَّـه مِنْرِدّ الأَفْراحْ
وِهْمُوم بْلادِي بْتِنْزاحْ
تا يِصْفَى وِيْطِيب الْكاسْ
**
جيران الرّضا
عرس مارك أبي خطّار
ـ1ـ
وِصْلِتْ عَلَى بْلَوْزا زْلاغِيط الْفَرَحْ
يا مجدلَيَّا فَرْحتِكْ عِيدي
فَرْحَه كْبِيرِه كْتيرْ.. قِدَّاما انْشَلَحْ
مَلْيُون وَرْدِه انْقَطْفِت بْإِيدي
كِرْمال كِنِّه.. شَاعْرِكْ لَوْلا شَرَحْ
عَنْ فِهمْها.. بْيِتْعَتَّق نْبيدي
آيِةْ جَمال الْوَرْد عَ خْدُودَا انْجَرَحْ
وْمِن ضِحْكِتَا بْتِخْلَقْ دِني جْديدِه
كِرْمالْ شَبّ.. الْكَوْن مِتْلُو ما لَمَحْ
مِنْ بَيتْ بُو خطَّارْ.. جِيران الرّضَا
يا مِجدليَّا زَلغْطِي وْزيدي
ـ2ـ
صدَّقتْ هَلَّقْ.. بَعدْ كلّ اللِّي انْحَكَى
عَنْ هَـ الشَّلِيفِه الْـ صَار أَللَّـه مْبارَكَا
يا مَارك.. إِنْت وْهَـ الْعَرُوس الزَّنْبَقَه
فِيك الدِّنِي، بْنِتْفِةْ مَحَبِّه، تِمْلِكَا
حِبَّيتْها وْخِبَّيتْ يَوم الْمُلْتَقَى
وْصِرت السَّعادِه بْفَرد إِيد تْحَرِّكَا
يا إِبِنْ عَيْلِه عايْشِه عِيشِةْ تقَى
بِالسِّرْ عِرسَكْ كانْ.. خِفْت تْلَبِّكَا
لَكِن كَمالْ الأُمّ يَللِّي مْعَلّقَه
سْنينَا عَ فَرْحِةْ ماركْ.. مُشْ رَحْ تِتْرِكَا
قالِتْ: يا حَنَّا قُومْ شَمْسِي شَارْقَه
قِللُّو لْيُوسِفْ رِنّ جَمِّعْ أَهِلْنا
دَبْكِة زْغِير الْبَيتْ لازِمْ نِدْبِكَا
ـ3ـ
انْشَاللَّـه بْتِتْهَنُّوا عَلَى طُول الْمَدَى
وْضِحْكاتْكُنْ بِالْعُمرْ يِطْلَعْلا صَدَى
إِنْتُو تْنَينْ.. وْحُلمْكُنْ تِبْنُوا عْيالْ
لا تِتْركُوا هَـ الْحُلمْ يِطْويهْ الرَّدَى
عِيشُوا بْسَعادِه وِبْفَضَاوِةْ بالْ
مِنْ دُونْ سَعادِه هَـ الْعُمر رَايِحْ سُدَى
وْلا تِسْمَعُوا مْن النَّاسْ قِيل وْقالْ
الْقِيلْ.. يا ما هَدَّم بْيُوت البَشَرْ
وِالْقالْ.. ما خَلاَّ حَدَا يْصَاحِبْ حَدَا
**
ماري الزّغيره
ألقيت في عرس جورج وماري غنّوم، 3/7/1992
ـ1ـ
ماري الزّغِيرِه كِبْرِت وْصَارِتْ
زَهْرَه.. تْوَزِّع عِطرْها عَ النَّاسْ
بْبِنتْ كَوْكَبْ ضَيْعتي احْتارِتْ
مِتلْ شَمْعَه.. ضَوِّت الْقِدَّاسْ
فِرْحت الأُمّ الْـ رَبِّتَا وْطارِتْ
صَوْب السَّما تا تِطْرُد الْوِسْواسْ
تْقِللُّو: يا أَللّـه ليشْ تا جارِتْ
سْنِينِي عْلَيِّي وْقَطْعِت الأَنْفاسْ
مُوريس خِدْتُو.. دَمعْتي فارِتْ
حُزْنِي قَتَلْنِي.. الْحُزن ما لُو قْياسْ
وِكْلُود.. لَيْش كْلُود؟.. وِانْهارِتْ
صَعْبِه، يا أَللَّـه، يِنْشربْ هَـ الْكاسْ
بارِك الْبِنْت الْـ عِرْفِت اخْتارِتْ
شَبّ لابِس للرّجُولِه لْباسْ
بارِك عْيالِي كِيفْ ما دَارِتْ
إيد الْعِنايِه.. وْزَيِّنَا بْإِلْماسْ
وْلَوْلا الْغُرْبِه مْنِ الْفَرَحْ غارِتْ
وْغَطَّى الْبرْد عَتْماتْها ياربّ
تْروكْ حنّا يْدَفِيَّا بْإِحْسَاسْ
ـ2ـ
حَدْشيتْ، يا حَدْشِيتْ، بِهْدِيكِي
أَحْلى قَصِيدِه كْتَبتْها بِالْعُمْرْ
وْمُوَّالْ حُبِّي بْحِبّ غَنِّيكي
وْكَوِّمْ عَ إِجْرَيْكي تْلال الزَّهْرْ
زْرَعْنا صَبايا عُمرْنا فيكي
فْرِحْتي، فْرِحْنا، وْطار فينا الدَّهْرْ
وِالْيَوْم بِـ ماري بْهَنِّيكِي
سَمْرا.. وْغاروا مِنْ حَلاهَا السّمْر
وْجُورج مِن خِيرِةْ أَهاليكي
وِمْجدليَّا اعْتَزِّت بْهَـ الصِّهْرْ
ـ3ـ
ماري وْجورج تْنَيْن.. أَحْلى تْنَيْن
انْشَاللَّـه السَّعادِه تْلِفّ إِيَّامُنْ
مْنِ مْحَبِّتُنْ.. سَكْنُوا الْقَلبْ وِالْعَيْنْ
وْحَلُّوا الدِّنِي بِحْلاوِة كْلامُنْ
يا ربّ.. لا تْخَلِّي غْراب الْبَيْنْ
بِالْبَيْن.. يِطْفِي وَهْج أَحْلامُنْ
كِرْمال عَيْنُن بِفْرُش الْكَفَّيْنْ
سِجَّادْ.. يِمْشُوا فَوْق مِنُّو سْنِينْ
وْبِضْوِي شْمُوع الْعُمْر قِدَّامُنْ
**
